Кога растат првите заби кај бебето
Возраста на бебето кога ќе се појават првите заби е индивидуална работа и може многу да варира. Во просек првите запчиња се појавуваат на 6-7 месеци, но кај некои бебиња може да се појават и на 3 месеци или на една година. Првите катници најчесто се појавуваат на возраст од 10-14 месци.
Кај некои бебиња целиот процес поминува брзо и без проблеми, а некои имаат болно искуство. Нема шаблон, кај некои бебиња запчето може да се појави преку ноќ и безболно, а кај некои може да се забележува испакнатина на непцето неколку седмици предходно и тоа да биде пропратено со болка.
Врз времето во кое ќе се појават забите и начинот на кој ќе биде направено тоа има голема улога наследниот фактор. Ако кај родителите забите се појавиле порано, тогаш е веројатно тоа да се случи и кај бебето.
Најчесто прво се појавуваат долните предни запчиња, а потоа горните предни. Во просек помеѓу 7 и 9 месеци се појавува уште по еден пар секачи странично.
Кога ќе наполни 2-3 години, кај детето би требало да ги има сите 20 млечни заби.
Симптоми на растење на првите заби кај бебето
Симптомите варираат од едно до друго бебе. Често пати родителите и лекарите не се соглсуваат со тоа кои се симптоми на растење на забите, а кои се поврзани со некој друг здравствен проблем. Еве ги најчестите симптоми:
Бебето е иритирано. Притисокот кој го прават острите заби на непцето на бебето, може да биде многу болно искуство за него. Болкта прави бебето да биде понервозно.
Болката обично е најизразена кога излегуваат првите секачи и првите катници – заради поголемата површина. Но некои бебиња се нервозни без разлика на тоа кои заби растат.
Лигавење. Често пати кога растат забите, бебињата повеќе се лигават. Кај некои бебиња лигавењето е поизразено, а кај некои е послабо.
Кашлање. Зголеменото лачење на плунка може да го тера бебето да кашла. Нема потреба за загриженост, ако бебето не покажува други знаци на настинка.
Осип на брадата. Зголеменото лачење на плунка може да ја иритира кожата околу устата. За да го спречите ова, почесто нежно бришете го бебето без да го триете, со мека навлажнета памучна крпа.
Гризење и џвакање. Кога на бебето му растат забите вообичаено гледа да стави во уста се што ќе му дојде на дофат. Притисокот на непцата додека нешто џвака, му го олеснува притисокот кој го прават забите и ја намалува болката.
Триење на образите или увото. Болката од непцата може да се пренесе на ушите и образите, особено кога растат катниците. Сепак понекогаш тоа може да е знак и на воспалено уво.
Пролив. Некои лекари не се согласуваат дека проливот може да биде симптом на растење на забите, но многу родители не би се согласиле со нив. Според некои лекари пак зголеменото лачење на плунка прави столицата на бебето да биде порастресита. Во секој случај ако проливот се јави кај 2 вршења нужда, јавете се на лекар.
Ниска температура. Повторно некои лекари не се согласуваат дека температурата е поврзана со растењето на забите, но многу родители имаат поинакво искуство. Сепак ако температурата потрае обратете се на лекар.
Како да му помогнете на бебето
Од голема помош ќе биде ако му дадете гумени играчки за гризење. Постојат играчки за оваа намена, исполнети со вода, кои може да се разладуваат и да бидат од голема помош.
Можете да му дадете да гриза крпче натопено со разладена вода. Ладното може многу да помогне за да се олесни болката, но не претерувајте.
Доколку на бебето веќе му давате храна, можете да му дадете малку ладен јогурт или друга малку разладена храна, на пример разладено пасирано овошје.
Во олеснување на болката може да биде од голема помош и ако со чист прст, нежно но цврсто му ги масирате непцата.